Home Kronika Prezantohen masat e reja të Qeverisë

Prezantohen masat e reja të Qeverisë

145
0

Prezantohen masat e reja të Qeverisë


Zëvendëskryeministri i Kosovës, Avdullah Hoti, në konferencë për media sot ka prezantuar masat e reja të Qeverisë për koronavirusin.

Ai ka thënë se janë takuar me odat kryesore ekonomike, dhe takimi është vazhdimësi e asaj që ishte dje, ku kanë folur për masat që duhet t’i ndërmarrë qeveria me rastin e koronavirusit.

Ai ka thënë se janë dakorduar për këtë listë masash:

Për të lehtësuar transportin e mallrave që vijnë në Kosovë, Ministria e Punëve të Brendshme dhe ajo e Administratës do të nxjerrë udhëzues të qartë për mënyrën se si lejohen maunat të hyjnë në Kosovë që kanë shofer shtetas të vendeve të tjera.
Ministria e Ekonomisë dhe ajo e Bujqësisë në konsultim me bizneset i inventarizojnë të gjitha rezervat shtetërore të produkteve të rëndësisë strategjike dhe përgatitin një plan të këtyre rezervave shtetërore për tre muajt e ardhshëm dhe këtë plan ia propozojnë Qeverisë për miratim ku në mes tjerash specifikohen masat që duhen të ndërmerren dhe buxheti përkatës përfshirë këtu edhe sasinë që mund të blihen nga ana e qytetarëve.
Ministria e Financave, Ekonomisë dhe ajo e Bujqësisë në konsultim me bizneset sjellin një plan për miratim për mbështetje të bizneseve.


Shtyhet afati për deklarimin e obligimeve tatimore dhe raportimeve financiare të bizneseve dhe organizatave të tjera sipas legjislacionit në fuqi deri më 30 prill 2020.


BQK në konsultim me bankat udhëzohen të përgatisin një plan operativ për funksionim të rregullt të sistemit financiar, për të përballuar situatën në të cilën gjendemi. Duke e përfshirë në veçanti prolongimin e obligimeve kreditore të klientëve të tyre deri më 30 prill dhe të shqyrtojnë riprogramimin e tyre.


Ministria e Ekonomisë bashke me ndërmarrjet e tyre që ofrojnë shërbimet publike si ngrohje, shërbimet me ujë dhe mbledhjen e mbeturinave të ngritin komitetin për menaxhimin e shërbimeve publike dhe të përgatisin planin e veprimit sipas situatës së krijuar.


ME do të mbikëqyrë punën e KEK-ut, KED-sit, dhe KOSTT-it për të siguruar furnizim stabil me energji elektrike.
Ndërmarrjet e shërbimeve të internetit dhe telefonisë mobile të sigurojnë funksionim të rregullt me qëllim të informimit të plotë të qytetarëve, duke siguruar që shërbimet nuk ndalen deri më 30 prill 2020 edhe për shkak të mos pagesës.


Këto masa pritet të miratohen nga Qeveria.

Kurse kryetari i Odës Ekonomike të Kosovës, Berat Rukiqi e ka falënderuar Qeverinë për reagim të shpejtë, lidhur me masat ndaj koronavirusit.

Rukiqi ka thënë se duhet theksuar që kjo është vetëm faza e parë e masave, deri në një periudhë të caktuar, për ta caktuar periudhën emergjente, pas së cilës gjë do të bëhet shqyrtohen pasojat.

“Është me rëndësi që bizneset dhe komunat ta respektojnë vendimet e Qeverisë”, ka theksuar ai.

“Vendimi duhet të respektuar edhe në atë pjesë që nuk ndalohen veprimtaritë e caktuara, por vetëm kafenetë, baret, restoranet dhe qendrat tregtare. Por nuk ndalohen veprimtaritë tjera”, ka thënë ai.

Rukiqi ka thënë se dje dhe sot janë mbyllur biznese që nuk ndalohen me vendim të Qeverisë, raporton Koha.net.

“Ne nuk e kemi komoditetin t’i ndalim të gjitha, pasi që ndalet zinxhiri i furnizimit”, ka thënë Rukiqi.

Rukiqi po ashtu ka bërë apel për bizneset që t’i ndërmarrin masat për mbrojtjen e punëtorëve.

LEAVE A REPLY

Please enter your comment!
Please enter your name here